«Բարձունք» կրթական–կամավորական շարժումը հիմնվել է 2020 թ-ին՝ Արցախյան երկրորդ պատերազմից անմիջապես հետո։ Հիմնադիրները ակտիվ հանրային գործունեություն իրականացնող առաջնորդներ են, այդ թվում՝ «Մեծն Տիգրան» աշխարհազորային գնդի կազմում պատերազմի ողջ ընթացքին մասնակից տղաներ։

«Բարձունք»-ը ծնվեց նոյեմբերի 10-ից մեկնարկած,  24/7 ռեժիմով ընթացող քննարկումների արդյունքում։ Քննարկման մասնակից մասնագետների, հանրային, գաղափարական գործիչների նպատակն էր՝ վերլուծել,  հասկանալ հետպատերազմական իրականությունը, պատճառահետևանքային կապերը, սահմանել հետագա անեիքները և անցնել գործի։ Ակնհայտ էր, որ կարճաժամկետ լուծումները սպառված են և անհրաժեշտ է որդեգրել ու ստանձնել երկարաժամկետ լուծումների կամք և պատասխանատվություն։

Գործունեության առաջին 2 տարում կառույցն աշխատում էր շուրջ 8 մասնագիտական խմբերով, որոնց նպատակն էր վեր հանել ոլորտային խնդիրները, ուրվագծել լուծումները, կազմել լուծումների փոքր մոդելներ՝ իրականացման և օրինակ լինելու նպատակով։ Հիմնական խնդիրը, որին առնչվում էին մասնագիտական խմբերը ցանկացած ողղությամբ աշխատելիս կրթությունն էր։ Արդյունքում, «Բարձունք»-ը հստակեցրեց իր գործունեության հիմնական ուղղությունը՝ կենտրոնանալով կրթության և այս ոլորտում համակարգային լուծումներ տալու վրա։

Բարձունքցիների համար կրթությունը միջոց է, ճանապարհ դեպի երազանքի Հայոց երկիր։ 

«Հայոց երկրի» գաղափարական–բովանդակային քարտեզը, մեր հայրենիքի տեսլականն է, որին ընդառաջ ենք քայլոմ՝ կրթելով և երկիրը կայացնողներին համախմբելով։